San Froilán: fútebol gaélico e Oktopusfest

Outro ano máis volta o San Froilán, a máis bela das festas do outono, e en Cultura do País volvemos recibir unha nova tempada da Liga Gallaecia de fútebol gaélico mixto coa nosa equipa, as Torques de Lugoslavia, defendendo o título de liga. A primeira xornada terá lugar no Campo Municipal de Nadela o sábado 7 de outubro a partir das 16:00 hs. cos partidos Torques -Buril e Fanecas Bravas -Cascarilha. Ao remate celebrarase o terceiro tempo no Bodegón A Fouce.

E o xoves 12 de outubro, como todos os anos, celebramos a Oktopusfest, a festa do polbo e da cervexa, que xa vai pola quinta edición. A polbada comezará ás 14:30 hs. no Lar da Cultura do País (Carril das Hortas, 1-baixo 5) e terá un prezo de 15 euros (12 euros para socios/as da nosa Asociación). Podédesvos inscribir en culturadopais@gmail.com até o martes 10 de outubro. 

Este ano incorporamos unha nova actividade á Oktopusfest: ás 18:00 hs. faremos unha cata de cervexas artesás da comarca, que será comentada por Jesús Rivera. Por 10 euros degustaremos as cervexas Bubela Loura (Lugo), Aloumiña Tosta e Orixe (Lugo), Casa Agrexo Buxo (Vigo de Mosteiro, Guntín) e Cova da Serpe Imperial Stout (Lugo), aprezando os matices e características de cada variedade. Podédesvos inscribir e recibir máis información en fillos.da.malte@gmail.com

Esta entrada foi publicada en Sen clasificar. Garda a ligazón permanente.