Sábado 26 de xaneiro: roteiro até a Insua de Seivane

Entre documentario e documentario temos organizado un roteiro para esta última fin de semana de xaneiro: unha camiñata até a Insua de Seivane, en Martul (Outeiro) o vindeiro sábado 27, con saída ás 10:00 de diante do Lar da Cultura do País e volta arredor das 17:00 hs. Farase unha parada para xantar na zona, para o cal é preciso levar comida. Para facer este percorrido, de 30 km. de distancia en total, requírese tamén calzado e condición física axeitadas. A realización do roteiro está supeditado ás condicións climatolóxicas favorábeis.

Publicado en Sen clasificar | Comentarios desactivados en Sábado 26 de xaneiro: roteiro até a Insua de Seivane

Comezarmos un 2018 cheo de Cultura do País

Cultura do País comezará o ano 2018 cunha completa programación cultural. Como xa vén sendo habitual, no mes de xaneiro teremos unha nova edición -e vai pola terceira- do ciclo de documentarios ‘Enxergando o País’. As sesións, que terán lugar os martes e venres  ás 20:00 hs. no Lar entre o 9 de xaneiro e o 2 de febreiro e contarán coa presenza dos/das directores/as, amosarán as mellores producións documentais que saíron no último ano sobre a realidade social e cultural galega, co seguinte programa:

  • martes 9 de xaneiro: ‘100% CEF’ (2016, Arraianos Producións), dirixido por Aser Álvarez e coa participación de Luis Tosar representando a Celso Emilio Ferreiro.
  • venres 12 de xaneiro: ‘O canteiro de Sebil’ (2017, Quinteiro do Umia), sobre a figura do militante nacionalista Xoán Xesús González, asasinado polos golpistas en 1936.
  • martes 16 de xaneiro: ‘Alén do Cosmos’ (2017, Pedro Pablo Alonso e Rubén Pardiñas), sobre o futbolista galego Santiago Formoso, que xogou no Cosmos de Nova Iorque coas estrelas do balompé da súa época.
  • venres 19 de xaneiro: ‘Morrer devagar’ (2017, Irene Pin e Begoña Fernández), unha ollada galega sobre a crise dos refuxiados en Grecia.
  • martes 23 de xaneiro: ‘Aberto e con fume’ (2017, Illa Bufarda), sobre a Comunidade de Montes de Tameiga e os seus espazos comunitarios.
  • venres 26 de xaneiro: ‘Sitio distinto’ (2017, Davide Cabaleiro), sobre a comunidade galega emigrada a Euskal Herria e as súas relacións coa cultura e a lingua vasca.
  • martes 30 de xaneiro: ‘O Moredo. A resistencia do Entroido Ribeirao’ (2016, Pinancho Audiovisuais), sobre a tradición do Entroido Ribeirao.
  • venres 2 de febreiro: xornada adicada ao audiovisual no ensino, coa proxección dos documentarios ‘Videopoemas 8 de marzo’ e ‘Eu cantar cantei’ (alumnado do IES de Arzúa) e a curta de ficción ‘O rumor’ (alumnado do IES Basanta Silva de Vilalba).

O sábado 13 de xaneiro a partir das 19:00 hs. tamén no Lar da Cultura do País contaremos coa presentación dunha das investigacións de meirande novidade e relevancia no eido da memoria histórica en Galiza: o libro recentemente saído do prelo ‘Meirás. Un pazo/ un caudillo /un espolio’, de Carlos Babío Urkidi e Manuel Pérez Lorenzo; publicación que amosa como a familia Franco recadou baixo coacción recursos para a construción do Pazo de Meirás e se continúa a apropiar del aínda corenta anos despois da morte do ditador. Na presentación deste libro contaremos coa participación dos autores, así como de María do Carmo García Negro en representación da Fundación Galiza Sempre -editora da publicación- e de Isabel Rodríguez Mate, Vicepresidenta de Cultura do País e Doutora en Historia Contemporánea.

Publicado en Sen clasificar | Comentarios desactivados en Comezarmos un 2018 cheo de Cultura do País

Salvar Pena Grande: coa mobilización popular paramos a venda do xacemento

Cultura do País congratúlase de que a mobilización popular conseguira parar a venda do xacemento

Desde Cultura do País queremos manifestar a nosa satisfacción pola retirada da poxa do xacemento paleolítico de Pena Grande, confirmada hoxe documentalmente polo funcionariado do Ministerio de Facenda -mais aínda pendente de publicación no BOE ao irmos presentar a oferta económica. Somos conscientes de que, de non ser pola mobilización e a resposta popular encetada a partir do anuncio de Cultura do País para concorrer á poxa, nestes momentos non estariamos a celebrar a paralización do procedemento. Nos últimos días constatamos que, trala nosa decisión de constituírmonos como última liña de defensa na protección do xacemento, fomos capaces de mobilizar colectivos, medios e persoas implicadas nun mesmo obxectivo. Tamén fomos capaces de mobilizar algúns intereses inmanentes non moi confesábeis que, aínda que xurdiron como unha resposta reaccionaria ao noso anuncio; tamén serviron para evitar que a poxa seguira adiante.

Hoxe é un día de celebración e de parabenizármonos, de agradecer as múltiplas achegas económicas que recibimos e a difusión que se lle deu á nosa campaña por innumerábeis colectivos, persoas e medios; sendo radiografía do país que temos e do grao de consciencia que fica en defensa do patrimonio. Mais a loita non remata aquí. Como xa temos manifestado, cónstanos que nos últimos anos se teñen vendido a través dese mecanismo da poxa mámoas e castros en diversos puntos do noso país, polo cal debemos seguir a traballar para que se garanta que non se volven dar este tipo de situacións nas que o Estado fai caixa co patrimonio de todo o pobo galego e o entrega a intereses especulativos que poden ser lesivos para a súa conservación.

Publicado en Sen clasificar | Comentarios desactivados en Salvar Pena Grande: coa mobilización popular paramos a venda do xacemento

decembro: A raíña das velutinas, obradoiro de trompa e aniversario do himno

Rematamos o 2017 cunha intensa actividade en Cultura do País. O venres 15 de decembro a partir das 20:30 hs. no Lar presentaremos o libro ‘A raíña das velutinas’, de Lionel Rexes, gañador do Premio Manuel Lueiro Rei de novela curta 2016. O propio autor comentaranos unha historia que sitúa a dúas rapazas enviadas pola Consellaría de Medio Rural para combater a praga das vespas velutinas nunha casa de turismo rural, na que coinciden cun grupo de recuperación da memoria histórica.

O sábado 16 de decembro de 16:00 a 21:00 no Lar terá lugar o obradoiro de trompa de boca impartido por Daniel do Pando, que nos ensinará as claves deste instrumento idiófono tradicional que permaneceu vivo na montaña lucense. Non é preciso levar instrumento, pois será subministrado no propio obradoiro. O prezo do curso é de 25 euros (20 euros socios/as de Cultura do País). Podédesvos inscribir en culturadopais@gmail.com até o 13 de decembro.

O mércores 20 de decembro cúmprense 110 anos desde a primeira interpretación do himno nacional no Centro Galego da Habana (Cuba), nunha función de homenaxe ao seu compositor, Pascual Veiga. Con motivo desta efeméride ás 21:00 hs. contaremos cunha actuación do Grupo Vocal Solo Voces no Xardín de San Roque, diante da estatua do compositor rexionalista Xoán Montes. Posteriormente, ás 21:15 hs. no Lar da Cultura do País a profesora da Universidade da Coruña Pilar García Negro dará unha palestra sobre as manipulacións que sufriu e a iniciativa parlamentar que ela desenvolvera no seu día como deputada do grupo parlamentar do BNG para volverlle a súa letra orixinal ao  himno nacional.

Publicado en Sen clasificar | Comentarios desactivados en decembro: A raíña das velutinas, obradoiro de trompa e aniversario do himno

Salvar Pena Grande: hoxe constituímos a garantía. A poxa segue vixente

Cultura do País constitúe a garantía para concorrer á poxa do xacemento de Pena Grande. A día de hoxe a poxa segue vixente

Como xa foi trasladado publicamente desde Cultura do País continuamos a campaña de recadación de achegas, que xa tivo unha importante resposta tan só nas primeiras horas de ser posta en andamento, malia as informacións que apareceron en algúns medios de comunicación que aventuran unha hipotética retirada da poxa do xacemento.

Queremos sinalar que até o momento non se tén producido ningún acto con forza legal nin actuación efectiva que retirara o xacemento da poxa e esta desenvólvese con total normalidade. Proba fefacente disto é que hoxe pola mañá vimos de constituír a garantía precisa como aval para podermos participar na poxa.

Observamos con preocupación como se están a lanzar mensaxes compracentes que, probabelmente polas presas por buscar unha solución a este despropósito, poden contribuír a desmobilizar a resposta popular. Cómpre permanecermos alerta pois unha mera declaración de intencións non é suficiente para efectivizar a retirada dos bens da citada poxa. É por isto que, mentres non haxa ningunha actuación oficial que confirme legalmente a paralización, a campaña de recadación segue en marcha e continuaremos a recibir apoios.

 

Publicado en Sen clasificar | Comentarios desactivados en Salvar Pena Grande: hoxe constituímos a garantía. A poxa segue vixente

Salva o xacemento da Pena Grande

Como probablemente coñezas polos medios, o Ministerio de Facenda vai poñer á venda por terceira vez un inmoble no concello de Vilalba que contén os que probablemente sexan os restos máis importantes do Paleolítico Superior galego: o xacemento da Pena Grande.

Consideramos que esta situación non se debería ter dado. As institucións públicas están a incumprir o seu deber de velar polo patrimonio cultural do noso país dunha forma tan obscena como o é alienando o que xa era unha propiedade pública. Que lles impide mañán vender o castro de Viladonga, o dolmen de Dombate ou o petróglifo de Mogor? É insultante que pretendan facer caixa a costa do patrimonio do pobo galego.

A nosa esperanza é que alguén entre en razón e retiren o ben da poxa. Mais se isto non se produce, nós articularemos unha última vía para evitar que este patrimonio acabe en mans de intereses especulativos que poidan afectar á súa integridade. Non sería a primeira vez, só hai que lembrar as múltiplas denuncias que o asociacionismo galego en defensa do patrimonio ten presentado en relación a xacementos convertidos en eucaliptais ou canteiras.

Pensamos que a sociedade civil, ante a situacións deste tipo, non debe ficar parada nin laiándose, e debe dar resposta desde unha óptica auto-organizada. De aí o lema que escollemos para esta campaña: “Esperta do teu sono”, que ademais fai referencia a un verso do himno nacional.

Que podes facer para apoiar a campaña?
Podes facer achegas económicas, con calquera cantidade, para axudarnos a cubrir o importe da poxa. Toda achega é importante.
Podes axudar a difundir nas redes sociais, no teu círculo de amizades, podes enviarnos un vídeo de apoio á campaña ao seguinte enderezo: culturadopais@gmail.com
Podes tamén colocar un peto de recadación no teu local aberto ao público.

Como podes facer efectiva a túa achega?
Hai tres posibilidades:

1. A prioritaria, por razóns de urxencia, mediante ingreso na conta bancaria:
ES45 0081 2141 6200 0125 0928.
Titular: A.C. Cultura do País
2. Nos próximos días poremos en marcha un crowdfunding a través dunha das plataformas de micromecenado máis habituais
3. Haberá petos en diversos lugares para facer efectiva a túa axuda en metálico.

Que pasará co teu diñeiro?
No caso de que non se chegue a adquirir o ben, por calquera causa (retírano da venda, que sería o desexable; ou ben non chegamos a cubrir o importe ou a nosa oferta é superada): devolveremos integramente o importe a quen se identifique para tal fin.

No caso de adquirirmos o ben, comprometémonos a:

• dar voz de xeito efectivo na xestión a todas as persoas que colaboren economicamente co proxecto nas actuacións que se realicen para poñer en valor o xacemento.
• darase publicidade da súa achega a aqueles colectivos ou persoas que queiran.
• no caso de recadarmos máis diñeiro do prezo, dedicarase o excedente a proxectos de xestión sustentable e posta en valor do espazo que decidades.

Que prazo tes para colaborar?
Antes do domingo 10 de decembro debemos saber se imos dispór de fondos suficientes para presentar a oferta. Por iso pregámosche que, se tes pensado colaborar, o fagas canto antes. Porén, se finalmente presentamos a oferta, a campaña de micromecenado seguirá activa un tempo máis para completarmos os fondos necesarios para cubrir a oferta.

 

Publicado en Sen clasificar | Comentarios desactivados en Salva o xacemento da Pena Grande

Máis en novembro: Magosto Asociativo e presentación de ‘Ocidente’

Despois dos actos polo aniversario do Manifesto de Lugo continúa a actividade no mes de novembro en Cultura do País. O vindeiro venres 24 de novembro participaremos no Magosto Asociativo, organizado pola Rede de Asociacións da que facemos parte. A festa comezará ás 19:00 hs. no Campo Castelo e contaremos coa actuación do grupo Os Amigos do Caldeiro.

O xoves 30 de novembro ás 20:30 hs. presentaremos o libro ‘Ocidente’, de Alberte Momán no Lar da Cultura do País. Esta obra, que amosa paralelismos con outras publicacións do autor, como a Triloxía Vattene ou Bosquexos para unha distopía, preséntase coa seguinte reflexión:

Atar é submeter.

Manter preso um animal com a pele de outro ani­mal.

A humilhação como a máxima expressão do domí­nio.

Submeter os escravos com a pele de outros escravos.

Aprendemos em crianças a falar a língua do homem branco, aquela do ocidente que se tornou universal, porque o ocidente só conhece uma língua.

Pego no copo, antes do primeiro sorvo olho ao redor e só vejo ocidente.

Publicado en Sen clasificar | Comentarios desactivados en Máis en novembro: Magosto Asociativo e presentación de ‘Ocidente’

Sábado 18 de novembro: 99º Aniversario do Manifesto de Lugo

Un ano máis en Cultura do País celebramos o aniversario do Manifesto de Lugo, asinado o 18 de novembro de 1918 polos asistentes á Primeira Asemblea Nacionalista no Hotel Méndez Núñez. Para este 99º aniversario preparamos unha xornada de actividades que, como vén sendo xa tradicional, ten o seu colofón coa Festa Dandi, que vai pola súa IX edición.

A xornada comezará ás 12:30 da mañá diante do Hotel Méndez Núñez coa ofrenda floral unitaria que vimos promovendo desde hai anos por parte das entidades culturais nacionalistas da cidade. Despois de realizarmos varias convocatorias en datas históricas do nacionalismo que gardan relación con Lugo demos formato conxunto á Convocatoria Faraldo, marco de actuación que fai referencia ao papel de Antolín Farlado, militante da causa galega que defendera a independencia de Galiza na Asemblea Federal de Lugo de 1843 e fora Secretario da Xunta do Goberno Revolucionario de Galiza en 1846, obrigado a marchar ao exilio pola represión da ditadura de Narváez.

Pola tarde as actividades concentraranse no café O Mesón (r/ Cregos, 31), onde a partir das 20:00 hs. o grupo de teatro da Sociedade Cultural Medúlio de Ferrol interpretará a peza ‘Mal de moitos’ (1915), escrita polos membros da Irmandade ferrolá Uxío Charlón Arias e Manuel Sánchez Hermida. Esta representación, dirixida e adaptada por Francisco Rodríguez Sánchez, que exporá unha contextualización previa do tempo das Irmandades da Fala, e será interpretada por Roberto e Felipe Vázquez Fernández.

Mo mesmo emprazamento a partir das 22:00 hs. terá lugar a Festa Dandi, coa actuación do grupo “decano” deste evento, os ‘Airiños da Freba’, que veñen de presentar recentemente o disco “O’de Lacón”. Como xa é tradicional, outorgaranse os Premios Dandi -que van pola VIII edición- ás persoas asistentes mellor caracterizadas coa estética dandi dos anos 20. A entrada aos eventos (teatro e concerto incluídos) custa 5 euros.

 

Publicado en Sen clasificar | Comentarios desactivados en Sábado 18 de novembro: 99º Aniversario do Manifesto de Lugo

31 de outubro: VIª edición do Lugo de Medo

Chega a noite de Samaín e, con ela, o Lugo de Medo. Nesta sexta edición temos preparada unha xincana do medo, na que as persoas participantes terán que superar probas terroríficas nos recunchos máis escuros da cidade. A actividade comezará ás 22:00 hs. no Lar da Cultura do País e, ao remate, contaremos historias de lobos, de trasgos, de mouras e de ánimas do alén con caldo e queimada… ímolo pasar de medo!

Publicado en Sen clasificar | Comentarios desactivados en 31 de outubro: VIª edición do Lugo de Medo

e despois do San Froilán… máis Cultura do País

Aínda coa resaca do San Froilán continuamos a programar actividades en Cultura do País. Volven outro ano máis os cursos de canto e pandeireta tradicional. Desta volta redobramos oferta con aulas de mañá e de tarde. Os cursos da mañá impartiraos os xoves Branca Villares, en horario de 11:00 a 12:oo para iniciación e 12:00 a 13:00 para o curso básico. A docencia vespertina correrá a cargo de Pepa Yáñez, que incorporará tamén ás aulas a ensinanza doutras percusións, os mércores de 20:00 a 21:00 iniciación e de 21:00 a 22:00 perfeccionamento. O custo dos cursos é de 20 euros ao mes (15 euros para socios/as de Cultura do País). Podedes obter máis información e inscribirvos en culturadopais@gmail.com.

O domingo 22 de outubro realizaremos a inspección de outono do río Ladra, encadrada dentro do Proxecto Ríos. Sairemos ás 9:30 de diante da Facultade de Formación do Profesorado e dirixirémonos ao Clube Fluvial de Begonte para testar o estado de saúde ambiental do río. Recoméndase traer roupa e calzado axeitados para andar e bocata ou similar para comer durante a inspección. Podédesvos anotar até o 19 de outubro en culturadopais@gmail.com.

E a última fin de semana do mes organizamos unha viaxe de dous días á comarca da Limia e o Alto Tâmega. Visitaremos Montalegre, o Couto Mixto, Vilar de Santos e Xinzo. A viaxe partirá o sábado 28 de outubro ás 9:00 de diante da Facultade de Formación do Profesorado -onde nos repartiremos en carros- e farase pernocta no Albergue de Vilar de Santos. O custo da viaxe é de 55 euros (45 € socios/as) e inclúe aloxamento e almorzo, entrada do museo, cea do sábado e xantar do domingo. Inscricións en culturadopais@gmail.com até o mércores 25 de outubro.

Publicado en Sen clasificar | Comentarios desactivados en e despois do San Froilán… máis Cultura do País