Cultura do País

Cultura do País, conxuntamente coa Zona de Lugo d’A Mesa pola Normalización Lingüística, organizamos un concerto con motivo do Día das Letras, que terá lugar o vindeiro sábado 19 de maio a partir das 23:00 hs. no Clube Clavicémbalo. Consistirá nunha actuación do coñecido grupo de música electrónica Safari Orquestra, máis o DJ Dr.Think.

A este evento puxémoslle o título de 5.1, en galego, lingua propia!, en referenza ao artigo do xornalista Fran P. Lorenzo (5.1: a verdade revolucionaria) que respostaba á censura exercida contra un libro de texto de lingua galega polo feito de afirmar no seu interior o mesmo que di o artigo 5.1 do Estatuto de Autonomía, que a lingua propia de Galiza é o galego.

Con este evento queremos reivindicar a lingua como símbolo inequívoco de identidade do noso pobo e denunciar o carácter galegofóbico de quen está á fronte das institucións autonómicas, principalmente do papel que está a ter o Valedor do Pobo, cunha cuestionábel actuación en relación aos dereitos lingüísticos da poboación galega.

O prezo da entrada é de 7 euros, con prezo reducido de 5 euros a socias e socios de Cultura do País e d’A Mesa.

Asemade, Cultura do País, como entidade integrante da Plataforma Queremos Galego, participou canda outros colectivos na rolda de prensa de presentación da manifestación que terá lugar o vindeiro xoves 17 de maio, Día das Letras, a partir das 12:00 desde a Alameda de Compostela baixo o lema ‘Paremos os ataques contra o galego’. Desde a nosa Asociación queremos facer un chamamento público a saír á rúa reivindicar o dereito a vivirmos en galego os 365 días ao ano e demostrando que non imos permitir que se destrúa o noso idioma e a nosa cultura.

«Avisar, acordar, animar e; sobre todo, libertar, agitar e dar poder« … o repertorio do Zeca na expresión musical e poética do grupo de Canto de Intervenção do Núcleo Norte da Associação José Afonso (AJA) fixo vibrar e dar azos ao público asistente neste tempo de desesperanza imposta. Unha magnífica interpretación e posta en escena no hemisferio da programación.

Comezou a xornada na biblioteca do IES Ollos Grandes coa sesión de ‘Escandinávia Bar’, na que persoas que asistiron a algún dos tres concertos do Zeca Afonso en Lugo nos anos 70 expuxeron a súa memoria daquel tempo, do que representaba para eles o cantautor portugués nun contexto de ditadura fascista na que a persecución contra a oposición e o movemento estudantil era diaria e sistemática; contexto no que o ‘Grândola, Vila Morena’ se chegaría a converter nun himno da loita antifranquista.

Esta conversa serviunos para coñecer que houbo, cando menos, tres visitas do Zeca a Lugo desde o primeiro concerto, en 9 de maio de 1972 no Círculo das Artes, do que temos constancia a través do testemuño de Arturo Reguera, até o de 1975 no auditorio do barrio do Sagrado Corazón, acompañado por outros cantautores, entre eles o galego Benedicto (Voces Ceibes). Hai datos dunha outra presenza para realizar un concerto, probabelmente canda Luis Cilia, en marzo de 1973, que foi prohibida polas autoridades franquistas. No concerto do Sagrado Corazón, do que existe unha memoria máis nidia por parte das persoas asistentes, as e os militantes nacionalistas exhibiron diante do público unha faixa coa lenda «Viva Galiza Ceibe» cando o Zeca interpretaba o ‘Grândola’.

Rematou este primeiro acto coa interpretación colectiva por parte das persoas asistentes da canción de José Afonso ‘Escandinávia Bar-Fuzeta’, que daba nome á actividade. Despois, unha pausa para departir informalmente entre o público acompañando a conversa cun café, un viño de Porto ou un boliño. Seguidamente, Paulo Esperança, do Núcleo Norte da AJA, fixo un percorrido polo triángulo máxico do Zeca, formado por tres territorios que marcaron o espírito cívico e social da súa obra: África, Portugal e Galiza. A súa vinculación co noso país foi moi forte e el mesmo afirmara en varias ocasións que se sentía moi aprezado e comprendido polo público galego, reforzando o lazo cultural e lingüístico que nos une con Portugal.

Xa deslocado o público ao Salón de Actos do instituto, chegou a actividade que pechaba a sesión de tarde nese centro. Ante un público que ateigaba a sala e se amosaba entregado co espectáculo, o grupo de Canto de Intervenção da AJA fixo unha didáctica e amena contextualización das loitas sociais que recollen as distintas expresións  do canto de intervención en Portugal e noutras partes do mundo: Boris Vian, Bob Dylan, Víctor Jara, Sérgio Godinho, Rui Mingas, Adriano Correia de Oliveira e, por suposto, José Afonso. Especialmente agradábel foi a interpretación de ‘Achega-te a mim, Maruxa’, do Zeca Afonso, e ‘Cantar de emigração’ -a partir da letra de Rosalía- de Adriano Correia de Oliveira. Un longo e animado concerto que rematou coa interpretación colectiva do ‘Grândola’ por todo o auditorio.

O broche dourado da xornada púñao o concerto de João Afonso e Fred Martins no Clube Clavicémbalo. Co cartaz de «aforo completo» e  un público entusiasta, estes dous marabillosos intérpretes desenvolveron o seu repertorio, salferido de pezas do Zeca como ‘Canta camarada, canta’, ‘Vampiros’ e, como non, a canción coa que rematou o concerto con toda a sala a coro toda a sala, máis unha vez, a última na xornada mais non seguramente a derradeira da noite na gorxa dos e das asistentes: ‘Grândola, Vila Morena’.

Podedes ver unha completa cobertura dos eventos por parte da Canle de Youtube cousasdelugo11 e, proximamente, un outro vídeo elaborado polo portal GZ Vídeos.

Desde Cultura do País queremos expresar o noso conforto polo desenvolvemento da xornada, agradecendo especialmente ao profesorado e máis o alumnado de português da Escola Oficial de Idiomas e dos IES Ánxel Fole e Ollos Grandes a súa implicación e participación activa na xornada de homenaxe.

Continuando con esta primavera da lusofonía, Cultura do País celebra o vindeiro sábado 5 de maio unha xornada de homenaxe ao cantautor portugués Jose Afonso, que hai 40 anos, o 9 de maio de 1972, asistía a Lugo para dar un concerto, un día antes de que cantara o ‘Grândola, Vila Morena’ por primeira vez en Galiza.

Esta xornada, que é organizada conxuntamente cos Departamentos de Português da Escola Oficial de Idiomas e máis dos centros de Ensino Medio de Lugo (IES Ánxel Fole e IES Nosa Señora dos Ollos Grandes) e a Associação José Afonso de Portugal (AJA), conta coa colaboración da Concellería de Cultura e Turismo do Concello de Lugo. Comezará cunha serie de actividades académicas que terán lugar no IES Nosa Señora dos Ollos Grandes ás 16:30 cunha sesión que leva por título ‘Escandinávia Bar’ -nome tirado dunha letra do Zeca Afonso-; acto ao que se convoca ás persoas que acudiron a ese concerto ou que viviron en Lugo nesa época a que compartan as súas lembranzas, traian imaxes da época e nos axuden a coñecer o contexto e a forma na que se vivíu ese acontecemento na cidade por aquel entón.

Continuará a xornada ás 17:30 cunha palestra de Paulo Esperança, membro da AJA, que leva como título ‘O Triângulo Mágico do Zeca: África, Portugal, Galiza’. Seguidamente, ás 19:30 terá lugar un concerto-espectáculo do grupo de de Canto de Intervenção do Núcleo Norte da AJA. Todas estas actividades son de acceso libre e gratuítas.

Contra a noite, ás 23:00, no Clube Clavicémbalo (R/ dos Paxariños, 23) contaremos coa presenza de João Afonso e Fred Martins; quen nos ofrecerán un concerto que pechará a xornada de homenaxe. O prezo da entrada é de 15 euros, con custo reducido para persoas asociadas a Cultura do País, a 10 euros.

 Non o perdas e… traz outro amigo também!

Cultura do País, en colaboración co Departamento de Português da Escola Oficial de Idiomas de Lugo, celebra o vindeiro xoves 26 de abril a segunda edición da Noite da Lusofonía, evento co que pretendemos explicitar o carácter internacional da lingua galega e reforzar os lazos culturais cos países lusófonos. A primeira edición foi adicada a Angola e contou cunha actuación de Aline Frazão. Esta segunda edición, adicada a Portugal, quixémola enmarcar entre dous acontecementos: o 25 de Abril, data da Revolução dos Cravos, e mailo 40 Aniversario do concerto do Zeca Afonso en Lugo en 1972.

O 25 de Abril de 1974 prodúcese o golpe militar levado a cabo polo Movimento das Forças Armadas e apoiado polas masas populares que pon fin ao longo réxime ditatorial do Estado Novo. O termo Revolução dos Cravos débese a un episodio deste levantamento popular, no que unha florista de Lisboa repartíu caraveis entre o pobo que tomaba a rúa, quen os ofrecían aos militares para os colocaren sobre as escopetas. A clave para iniciar o levantamento era a transmisión da canción Grândola, Vila Morena, de Jose Afonso, no programa Limite da Rádio Renascença. Esta canción fora ilegalizada polo goberno despois de gañar o Festival RTP da Canção por incitar ao comunismo. Esta canción fora cantada por primeira vez en Galiza no concerto que José Afonso dera no Burgo das Nacións en Compostela o 10 de maio de 1972, nunha xira que realizara polo noso país e pola cal fixera parada en Lugo o día anterior para ofrecer tamén un concerto. Este concerto tiña unha significación de loita antifascista nun contexto ditatorial tanto en Portugal como no Estado Español.

Leva, pois, como título Portugal: Abril Sempre, e contará coa actuación do lisboeta Gonçalo Guerreiro, destacado escenógrafo no seu país e integrante da compañía de teatro galego-portuguesa Elefante Elegante, que nos vai presentar unha sesión de fado electónico. A actuación será no Clube Clavicémbalo (R/Paxariños, 23) a partir das 23:00hs. O prezo da entrada é de 5 euros, con prezo reducido de 3 euros para socios/as de Cultura do País.

Cultura do País vén de presentar en rolda prensa na Galería Sargadelos, canda representantes dos Departamentos de Português da Escola Oficial de Idiomas e máis dos centros de ensino medio da cidade de Lugo, a programación conxunta que teñen conxunta para a vindeira quincena e que vira arredor da celebración da Revolução dos Cravos e do 40 aniversario do concerto do Zeca Afonso en Lugo.

Esta programación comezará o vindeiro xoves 26 de Abril, no que a nosa Asociación Cultural celebra a 2ª edición da Noite da Lusofonía, en colaboración co Departamento de Português da Escola Oficial de Idiomas. Desta volta, o concerto adicado a Portugal co gallo do aniversario da Revolução dos Cravos, levará como título Portugal: Abril Sempre, e consistirá nunha actuación do fadista electrónico Gonçalo Guerreiro. Dará comezo ás 23:00 no Clube Clavicémbalo. A entrada custa 5 euros, habendo un prezo reducido de 3 euros para socios e socias de Cultura do País.

O seguinte evento celebrarase o sábado 5 de maio e consistirá na Homenaxe ao Zeca Afonso polo 40 aniversario do concerto que deu en Lugo en 1972. Trátase dunha programación completa dunha xornada en colaboración coa Associação Jose Afonso (AJA) e os departamentos de português da EOI e máis dos IES Nosa Señora dos Ollos Grandes e Ánxel Fole; así como da Concellaría de Cultura e Turismo do Concello de Lugo.

Nesta xornada haberá unha parte máis formativa e outra lúdica. Comezarán as actividades formativas xa de tarde (16:30) no IES Nosa Señora dos Ollos Grandes cun Café Escandinávia, no que a xente que acudíu a aquel concerto porá en común a súa experiencia. Posteriormente terá lugar (17:30) unha palestra de Paulo Esperança, do Núcleo Norte da AJA á que seguirá un concerto-espectáculo do grupo de Canto de Intervenção dese colectivo (19:30). Todas estas actividades, a celebrar no devandito instituto, son de entrada libre e gratuítas.

Como broche a esta xornada, celebrarase un concerto con João Afonso e Fred Martins a partir das 23:00, de novo no Clube Clavicémbalo. O custo das entradas é de 15 euros, con prezo reducido a 10 euros para socios e socias de Cultura do País.

As entradas para ambos espectáculos -Noite da Lusofonía e concerto de João Afonso+Fred Martins- estarán á venda anticipada na Libraría Trama (Avda. da Coruña, 21) e máis no Clube Clavicémbalo (R/Paxariños, 23).

Podedes ver algúns fragmentos da rolda de prensa na nosa Canle de Youtube.

O pasado venres 13 de abril tivemos a terceira sesión que pechaba o ciclo de Monólogos na Abadía, promovido por Cultura do País. Nesta, Anxo Lamelo, integrante do grupo Menos dá unha pedra, presentounos ás persoas asistentes o monólogo «E para vivir, Lugo».

Un científico do Campus analiza os aspectos definitorios da sociedade lucense: os seus costumes, os sinais de identidade do lucensismo, persoeiros ilustres e festas e acontecementos destacados. Vestido coa súa bata branca e recén saído do laboratorio procedeu a diseccionar en capítulos os elementos diferenciais do ser lucense.

Mereceron especial atención as super-criticonas, o alto nivel de atropelos que se produce na provincia e mailas tapas especiais que se serven nalgúns ‘bares’ de Lugo, facendo mención á especialidade culinaria da tarta de 8 pisos do Garañón. Tamén nos explicou de onde vén o odio secular entre lucenses e coruñeses/as e a envexa que estes/as nos teñen.

O deporte ocupou outro dos temas do estudo científico, facendo un repaso polas equipas lucenses, e mesmo polos deportes de risco aos que a veciñanza da cidade se adica cando fai deporte polo Paseo do Rato, preparándose para as carreiras do ‘Corre con Noos’.

En canto a edificios senlleiros, expuxéronse as tradicións ancestrais lucenses arredor da Muralla e o impacto social da construción do edificio do Novo Hospital, o HULA. E como non, falando de tradicións, as Festas do San Froilán -»as do santo, non as do torpe«- e o costume de comer o polbo -que todo o mundo sabe que ten que ser con viño-, ao que vai asociado o ‘tour dos masoquistas’ ao longo das atraccións que hai instaladas no recinto feiral. Fíxose aquí unha parada para facer un estudo de campo co relato do episodio dos valentes da Piringalla na Pasaxe do Terror.

No apartado de persoeiros ilustres destacáronse a ‘La Bicicleta’, Dorribo e o catálogo actualizado de políticos lucenses. Mais este apartado xa se converteu nun estudo multi-disciplinar, coa colaboración de Eros Ramazzotti, Fofito e mesmo Joaquín Sabina, que lle permitíu ao publico asistente ter unha caracterización máis completa da sociedade lucense.

Podedes ver algúns anacos deste espectáculo na nosa Canle de Youtube.

O Lar da Cultura do País acolleu o xantar da Iª Asemblea Nacional da Liga Estudantil Galega, organización estudantil soberanista da esquerda transfomadora, que celebra esta xuntanza hoxe en Lugo baixo o lema «En movemento».

Desde a nosa Asociación Cultural saudamos ao estudantado galego organizado na Liga e agardamos que o debate e os acordos que tomen sexan produtivos para a defensa dun ensino público, galego, democrático e de calidade.

Cultura do País pecha o seu ciclo de Monólogos na Abadía o vindeiro venres 13 de abril cunha sesión na que Anxo Lamelo presentará o espectáculo «e para vivir, Lugo», co que a ben seguro nos fará pasar un bo rato. Será, como até o de agora, na Cervexaría A Abadía (Pza. da Milagrosa, 14) , a partir das 22:45 hs.

Non o perdades!

O vindeiro domingo 1 de abril terá lugar a primeira actividade programada pola sección Ultreia Mocidade e Patrimonio, grupo de socios/as de Cultura do País que se constituíu o pasado mes de marzo e que procura vencellar o activismo xuvenil coa defensa e dignificación do patrimonio histórico galego nun sentido amplo, entendido como un sinal de identidade como pobo.

Esta primeira actividade realizarase en colaboración coa Asociación de Defensa do Patrimonio e de Reconstrución Histórica Trebas Galaicas e consistirá nun roteiro polas «terras dos mouros» visitando diferentes puntos de interese nos concellos de Friol, Outeiro de Rei e Begonte.

Percorreremos as antas do neolítico, tumbas que durante milenios salientaron na paisaxe galega, sendo a primeira e gran manifestación contundente do noso pasado máis ancestral. Visitaremos santuarios de elección de reis celtas como Pena de Rodas, marcador solsticial conectado coa Pena dos Mouros.

A cita será o vindeiro domingo 1 de abril ás 10:00 hs. na Praza da Milagrosa de Lugo, onde nos xuntaremos para organizar o transporte até eses lugares.

Animámosvos a participar nesta actividade que será de grande interese para descubrir «tesouros» da nosa historia e da nosa cultura que están totalmente esquecidos. Podedes completar información sobre a temática do roteiro consultando o artigo que se publica no blogue de Ultreia.

Cultura do País continúa o seu mes literario. Despois da presentación da segunda edición de Bandeiras da Galiza, de Jose Manuel Barbosa, organizamos un novo acto no que presentamos dous poemarios que son produto da creación literaria de dous socios da nosa Asociación: Jose Manuel Nunes e máis Xosé Estévez.

Jose Manuel Nunes (Agreimunde -O Páramo, 1985) é un estudante da Facultade de Humanidades de Lugo que, malia a súa mocidade, xa vai pola súa segunda publicación. En 2009 lanzou ao prelo o libro de contos titulado Um país oculto pelas silveiras (Manas Editora). Agora presenta o poemario Azul Ultramarino.

Xosé Estévez (Guntín, 1954), Licenciado en Dereito, ten unha longa bagaxe pola Administración desempeñando diversos postos de responsabilidade. Publica regularmente poemas na revista Xistral, editada polo Concello de Lugo, e ten xa publicadas varias obras na editora MeuBook: a novela Morte na Muralla (2011) e máis A túa ausencia que non se apaga (2012), poemario subtitulado Poemas escritos coa soidade sangrando na punta da lingua, que será a obra que presentará no acto.

Esta presentación conxunta de libros terá lugar o vindeiro xoves 22 de marzo a partir das 20:00 hs. na Libraría Trama (Avda. da Coruña, 21). Pecharase a sesión coa actuación de Naír, integrante de Irimia Cantareiras, e máis de Carolina, membro do grupo folk Saltanocribo.