Vai chegando a primavera… cultural

Xa se achega a primavera en Lugo e na Cultura do País temos unha chea de actividades para recibirmos o equinoccio. O venres 17 de marzo celebraremos, como xa vén sendo tradicional na nosa Asociación, a festa suevo-irlandesa polas efemérides de San Patricio -festa nacional irlandesa (17 de marzo)- e San Martiño de Dumio (20 de marzo), bispo de Braga no século VI e artífice da conversión ao cristianismo do Reino Suevo, primeiro reino independente en Europa tras a caída do Imperio Romano. O lugar de celebración será outro ano máis o Bodegón A Fouce a partir das 21:00 hs. Non faltarán na celebración os suevitos quentes, a cervexa artesá de billa Casa Agrexo; e máis unha selección de música irlandesa e alemá. Esta festa, que celebramos xa por terceiro ano consecutivo, vaise consolidando aos poucos no noso País e este ano xa son varias as localidades -ademais de Lugo- que organizan festas deste tipo: Compostela, A Estrada, Carballo, Ferrol e Pontedeume.

O venres 24 de marzo temos fútebol no Lar… si, fútebol!… e ciclismo!… si, ciclismo! Martiño Suárez e Carlos Meixide liberarán polo noso local as feras do particular zoolóxico de deportistas desviados recollido no libro ‘Bestiario do vestiario’, que compila textos da sección do mesmo nome publicada no seu día no xornal Dioivo. Este lanzamento, amenizado coa actuación do grupo Grampoder, terá lugar no Lar da Cultura do País a partir das 20:30 hs. Pioneiras incomprendidas, goleadores borrachos, nazis, ciclistas drogados, ‘hooligans’ bizantinos, campións negros, perdedores exemplares, rastafaris, filósofos gregos, santos, espías da RDA, Elvis e Bob Marley…  compartirán con nós uns petiscos e un sorriso nesta presentación.

E chegada a primavera toca roteiro da Semente Lugo. Cultura do País colaborou coa campaña de microfinanzamento deste centro de ensino en galego -do que facemos parte como entidade asociada- ofertando como recompensa a participación en algúns dos roteiros que programamos ao longo do ano. Nesta primavera organizaremos mensualmente un roteiro guiado por diversos espazos do concello de Lugo e con diferentes temáticas formativas para crianzas e maiores, que será de asistencia gratuita para socios/as de Cultura do País e mecenas da Semente Lugo. O primeiro destes roteiros estará adicado á fauna do Río Miño, que nos amosará o noso socio Roi Cuba o domingo 26 de marzo a partir das 9:00 diante da Ponte Romana. Este roteiro é de dificultade baixa, cun percorrido aproximado de 6 km. Cómpre levar comida para facermos un xantar de convivio no Parque do Miño. Podédesvos inscribir en culturadopais@gmail.com.

Publicado en Sen clasificar | Deixa un comentario

De febreiro a outubro e roteiro pola Ribeira Sacra

Co mes de marzo comezamos a desenvolver un ciclo de actividades que titulamos ‘1917-2017: De febreiro a outubro’, en conmemoración do Centenario da Revolución Bolxevique. Mensualmente organizaremos unha actividade dentro desta dinámica, sendo a primeira delas a proxección de cinema mudo ‘Stachka’ (‘A greve’), de Serguei M. Eisenstein (1925), que versa sobre o conflito nunha fábrica na Rusia de 1903. O filme está subtitulado en galego internacional. Fixemos coincidir esta actividade coa celebración do Día da Clase Operaria Galega, de forma que terá lugar o vindeiro venres 10 de marzo a partir das 22:00 hs. no Lar da Cultura do País.

O sábado 11 de marzo faremos o primeiro roteiro deste ano, visitando a Ribeira Sacra. Sairemos ás 9:00 hs. de diante da Facultade de Formación do Profesorado, para repartirnos en carros. Durante a xornada visitaremos a explotación gandeira Casa da Fonte, en Mañente (Pantón), achegarémonos ao románico das igrexas de Pombeiro e San Cosmede, ás tumbas antropomorfas en pedra do Preguntoiro e os viñedos da Touza e Amandi. Despois de xantar visitaremos o Ecomuseo de Arxeriz (O Saviñao) e a Feira do Viño de Chantada. O custo da actividade é de 20 euros (18 euros para socios/as de Cultura do País). Podédesvos anotar en culturadopais@gmail.com até o xoves 9 de marzo.

Publicado en Sen clasificar | Deixa un comentario

20 de xaneiro-21 de febreiro: 2ª edición de Enxergando o País

 

O vindeiro venres 20 de xaneiro comeza a segunda edición do Ciclo de documentarios Enxergando o País, unha nova selección do último do cinema documental galego, co que pretendemos que as proxeccións sexan un punto de encontro para reflexionar e debater sobre os aspectos da nosa historia, da nosa cultura ou da actualidade a partir das visións aportadas nos documentarios.

As proxeccións terán lugar os mércores e os venres ás 20:30 hs. no Lar da Cultura do País (Carril das Hortas, 1-baixo 5), entre o 20 de xaneiro e o 21 de febreiro. Nestes actos acompañarannos membros das equipas que crearon ou promoveron esas pezas audiovisuais. A primeira será unha sesión dobre, na que o laureado cineasta galego Marcos Nine nos presentará os documentarios ‘A Fábrica’ (2008) e ‘Sons do Mercado’ (2016). A programación completa será a seguinte:

  • Venres 20 de xaneiro, 20:30 hs.: A Fábrica e Sons do Mercado, con Marcos Nine
  • Mércores 25 de xaneiro, 20:30 hs.: Manuel María: paixón de palabra e de terra, con Fran Rei
  • Venres 27 de xaneiro, 20:30 hs.: Asolagados, con David Vázquez
  • Mércores 1 de febreiro, 20:30 hs.: Camilo: o último guerrilleiro de Galicia, con Alba Sánchez, Juan Pirola, Miguel García e Pedro Iglesias
  • Venres 3 de febreiro, 20:30 hs.: Entrar aos Vilares, con Cibrán Tenreiro, Toni González, Paz Veres e Antón de Guizán (Asociación Sociocultural Lareira de Soños)
  • Mércores 8 de febreiro, 20:30 hs.: Patrimonio Habitado e De porta en porta, con Xiana Iglesias e Óscar Senra (MaOs Cooperativa)
  • Venres 10 de febreiro, 20:30 hs.: As pedras de San Lourenzo, con Xurxo Ayán
  • Mércores 15 de febreiro, 20:30 hs.: Lembranzas dunha escola unitaria. Cabreiros, con Xosé M. Felpeto, Manuela Vilaboi e Xurxo Rodríguez
  • Venres 17 de febreiro, 20:30 hs.: A chave para 6000 presos. A vida na Arousa antes e despois da ponte, con Carlos Abraira (CEIP Illa de Arousa)
  • Martes 21 de febreiro, 20:30 hs.: A fronteira será escrita, con João Aveledo, Eduardo Sanches Maragoto e Vanessa Vilaverde

 

Publicado en Sen clasificar | Deixa un comentario

Comezando o 2017: o TTIP e obradoiro de defensa persoal

Comezamos un novo ano en Cultura do País coa presentación do libro colectivo O TTIP. Un cabalo de Troia contra a nosa soberanía, editado por Laiovento e que conta con contribucións, entre outros/as, de Bernardo Valdês e de Mar Pérez Fra, profesores de Economía Aplicada da USC e socios da nosa Asociación. O acto de lanzamento do libro terá lugar o martes 10 de xaneiro ás 20:30 no Lar da Cultura do País, no que contaremos coa presenza de Bernardo Valdês, un dos coordenadores da obra.

O sábado 14 de xaneiro teremos no Lar unha nova edición do obradoiro de defensa persoal impartido por Isaac Castro. O curso desenvolverase en horario de 10:00 a 14:00 e de 17:00 a 19:00 hs., cun custo de 20 euros (15 euros para socios/as de Cultura do País). Podédesvos inscribir até o xoves 12 de xaneiro en culturadopais@gmail.com.

Publicado en Sen clasificar | Deixa un comentario

Xoves 29 de decembro: Ruada do Apalpador

O vindeiro xoves 29 de decembro chega o Apalpador a Lugo procedente das montañas do Courel e fará un percorrido polas rúas máis céntricas e os locais sociais da cidade. Por iniciativa do centro de ensino Semente Lugo, do que Cultura do País fai parte como entidade asociada, e en colaboración co Mádia Leva e co Ateneo A Engranaxe, acompañaremos ao noso personaxe de referenza no Nadal no seu roteiro pola cidade.

A ruada comezará ás 18:00 no Mádia Leva, facendo paradas no Mercado de Nadal e principais prazas do recinto amurallado da cidade, para rematar o percorrido no Lar da Cultura do País. Animámosvos a facer parte da comitiva cos vosos instrumentos musicais e encher de ledicia a xornada, na que o Apalpador repartirá castañas e contará contos ás crianzas asistentes.

Publicado en Sen clasificar | Deixa un comentario

Domingo 18 de decembro: obradoiro de danza contemporánea

O domingo 18 de decembro temos no Lar da Cultura do País un novo obradoiro de iniciación á danza contemporánea impartido por María José Pérez González. Os aspectos que se ensinarán nesta actividade son: coñecemento elemental do propio corpo, estiramentos, coordenación entre movemento e música, traballo de escoita individual e colectiva e procura da expresión a través do movemento corporal. O obradoiro comezará ás 17:00 hs. e prolongarase até as 20:30 hs. e ten un custo de 15 euros por persoa (10 euros para socios/as de Cultura do País). Podédesvos inscribir até o venres 15 de decembro en culturadopais@gmail.com

María José Pérez González, Licenciada en Humanidades pola USC é socia de Cultura do País. Formouse en danza contemporánea na USC, de onde formou parte das súas compañía de danza con pezas como: A Escoita do corpo, 5 elementos, Clic ou A onde se fugan os valentes. Como creadora, directora artística, coreógrafa e intérprete ten participado en compañías de danza independente como Zur2-Danza, KAOS ou LEMBRANZAS. Dirixiu a función multidisciplinar Feito de terra e máis de amor, que desde Cultura do País promovemos como homenaxe ao poeta Manuel María o pasado 15 de maio.

Publicado en Sen clasificar | Deixa un comentario

Novembro: Manifesto de Lugo e Galegos nas guerras do Rif

manifesto-de-lugoOutro ano máis Cultura do País celebra o Aniversario do Manifesto de Lugo. Desta volta, coincidindo ademais coa efeméride centenaria da fundación das Irmandades da Fala, programamos unha fin de semana completa de actividade.

O venres 18 de novembro, coincidindo co aniversario da sinatura do Manifesto de Lugo, terá lugar a tradicional ofrenda floral diante do Hotel Méndez Núñez, cuxa convocatoria conta coa adhesión este ano de novos colectivos con presenza na cidade.

O sábado 19 de novembro será o día grande de celebración do 98º Aniversario do Manifesto de Lugo. A actividade comezará ás 12:00 hs. no Lar da Cultura do País cun obradoiro de regueifas impartido pola cantautora Alba María. O prezo do obradoiro é de 10 euros (5 euros para socios/as de Cultura do País).

Ás 21:00 hs. proxectaremos na Fábrica de Sons (R/Paxariños, 43) o filme de cinema mudo ‘Miss Ledyia’ (1916, primeira cinta galega de ficción), coa actuación do pianista Severiano Casalderrey. Despois do cinema (22:00 hs.) daremos conta dunha cea cocktail no Lar da Cultura do País, co custo de 15 euros (12 euros socios/as 14324372_1785748195039749_4979808828127031222_ode Cultura do País), para rematar a xornada coa xa tradicional Festa Dandi, que terá lugar ás 23:00 no Bodegón A Fouce (R/ Ramón Montenegro, 2). Nesta VII edición dos Premios Dandi -que galardoarán con magníficas pezas de artesanía do país ás persoas asistentes mellor caracterizadas coa estética dandi dos anos 20- contaremos coa actuación do dúo Touciño Blues, formado por Alba María (voz) e Queco Díaz (guitarra). A entrada é de balde.

irmandadesO domingo 20 de novembro ás 12:00 temos programada unha visita en grupo á exposición ‘Saúde e Terra, Irmá(n)s!’, na Sala Multiusos do Pazo de San Marcos. Como colofón aos actos arredor do Manifesto, o luns 21 de novembro ás 20:00 no Lar da Cultura do País Emilio Ínsua presentaranos o seu libro ‘A nosa Terra é nosa! A xeira das Irmandades da Fala (1916-1931)’, publicado en Baía Edicións.

14922964_10205709445174985_1890851501_oA actividade continuará no Lar o venres 25 de novembro ás 20:00 hs. coa presentación do libro ‘Galegos nas guerras do Rif. Paisaxe bélica e imaxinario anticolonial (1860-1927)’, acto no que o autor, o historiador Dionisio Pereira, presentará as crónicas de Xosé Ramón e Fernández Oxea ‘Ben Cho Shey’, Otero Espasandín, Rafael Dieste e outros galeguistas mobilizados na contenda bélica.

Publicado en Sen clasificar | Comentarios desactivados en Novembro: Manifesto de Lugo e Galegos nas guerras do Rif

Luns 31 de outubro: Lugo de Medo

lugodemedo2016v2

Como xa vén sendo habitual nestas datas de Samaín, Cultura do País prepara unha nova edición da actividade que denominamos Lugo de Medo, arredor das historias fantásticas ou de terror. Desta volta organizamos un Roteiro Pantasma, no que percorreremos os edificios que xa non están e máis os edificios abandonados polas administracións. O punto de encontro é ás  21:00 hs. no Lar da Cultura do País (Carril das Hortas, nº 1-baixo 5). Ao remate, ao remate, escorrentaremos cun caldo o medo e o frío.

Publicado en Sen clasificar | Comentarios desactivados en Luns 31 de outubro: Lugo de Medo

Domingo 23 de outubro: roteiro por Begonte

14713615_1175165079245117_4054353914650146347_n

Desde Cultura do País, como entidade adherida ao Proxecto Ríos -iniciativa de educación ambiental e participación cidadá en defensa dos ríos promovida por ADEGA-, organizamos o vindeiro domingo 23 de outubro unha inspección do río Ladra ao seu paso por Begonte. Trátase dunha avaliación pormenorizada do seu estado e características (velocidade da auga, caudal, canle, vexetación, fauna e flora…) nun treito de 500 m. do río seleccionado. Esta actividade complementarase cun roteiro polos caneiros do río Ladra.

Xuntarémonos ás 9:30 diante da Facultade de Formación do Profesorado para repartirnos en carros e dirixirnos ao Clube Fluvial de Begonte, onde comezaremos a actividade. Trátase dun roteiro de baixa dificultade. Recoméndase levar roupa e calzado cómodos, así como bebida e comida para comer durante o roteiro. Podédesvos inscribir até o xoves 20 de outubro en culturadopais@gmail.com

Publicado en Sen clasificar | Comentarios desactivados en Domingo 23 de outubro: roteiro por Begonte

8 e 9 de outubro: fútebol gaélico e II Congreso Froilanista

14469444_10207306565398755_2279889495883918930_nXa están aquí de novo as “festas máis belas do outono galego”: o San Froilán. Como xa vén sendo tradición, isto significa o comezo dunha nova tempada da Liga Gallaecia de fútebol gaélico mixto, na que compite a nosa equipa, os Torques de Lugoslavia. A xornada inaugural da tempada 2016-2017 terá lugar o vindeiro sábado 8 de outubro no Campo de Nadela a partir das 16:00 co partido entre a equipa local, os Torques, e o Cascarilha da Coruña. Ás 18:00 xogará o actual campión de Liga, O Condado, contra o Suévia de Compostela. A xornada rematará co partido das 20:00 entre Afiadoras de Ourense e Ambílokwoi de Vigo. Finalizada a competición, as xogadoras reuniranse no Bodegón A Fouce para celebrar o terceiro tempo a partir das 22:00 hs.

O domingo 9 de outubro o froilanismo será o protagonista, coa celebración do II 14572247_898642833599555_5969399069875961262_nCongreso do Partido Froilanista, cuxa destacada expansión organizativa permitirá que celebre o primeiro congreso da súa póla feminina, as Federiquistas. Será este evento o que abra os fastos de celebración da xornada froilanista, ás 17:00 no Lar da Cultura do País. Ás 18:00 terá lugar a ofrenda e acto de afirmación onda a Capela de San Froilán e ás 19:00 o II Congreso, que leva como palabra de orde “Pronuncie-se Maxestade”. Clausuraranse as ponencias co Baile-Asalto que a partir das 20:00 hs. no Bodegón A Fouce amenizará o Puto Coro do Exército Froilanista, máis DJ e foliada; así como o Banquete de Lugo (22:00 hs. no Lar da Cultura do País). Podédesvos inscribir no banquete en culturadopais@gmail.com. As adhesións á causa froilanista podédelas facer no evento de facebook do Congreso.

 

Publicado en Sen clasificar | Comentarios desactivados en 8 e 9 de outubro: fútebol gaélico e II Congreso Froilanista